公佈賽果… 我選擇了後者… 即是人工少, 職位低微, 但前景似乎比較明朗, 而且我興趣比較大的一份工作.

其實我都思前想後了好幾日, 兩個完全不同的機會放在你面前, 真有點難以決擇, 如果你問我是否介意人工及職銜, 坦白講我起初都幾介意, 所以一開始聽到這個offer時, 確實有點想掉頭就走~ 後來, 考慮到自己的興趣和前景, 似乎比名和利重要, 謝謝師姐和姫絲汀的詳盡分析以及寶貴意見, 還有我母親大人的體諒(當然要體諒啦~ 我仲邊有錢帶返屋企喎!), 冰鮮才能作出這個決定~

今朝未接到正式通知之前, 去了中樂團見工… 做了個令人虛脫的written test, 剩返無半條人命, 我極討厭考試, 因為我一定考唔到應有的水準! 搵下長工才知散打freelance真好賺, 這幾年來雖然在藝術行政工作上累積到一點點經驗, 但其實只是亂踫亂拼, 沒板沒眼, 唔知點解就做左咯! 或者大把人都是這樣工作, 話唔定有好多行政總裁都是傻下傻下充下充下就爬上頂, 不過我如果決定了要在藝術行政幹一番事業, 我就唔想充充下! 我唔要只係”做到”, 而唔知自己做緊咩! 即使你比個director/manager我做又如何! 我根本應付不來! 與其去小公司充大頭, 倒不如去間已成形的機構實幹一點, 打好根基吧!

工作+讀書幾年, 爬到了一定的水平, 然而今次要重新開始點回到原點, 回到第一份正式工作的水平, 心裡或多或少都會唔多舒服, 但我自知以往基礎都是不穩固, 只是我比較好運, 一直都沒出事~ 常常覺得自己當年沒有珍惜在APA時的工作, 沒有把握機會去學去做, 就已經跑了出來, 今次要點回到原點, 也許就是多給我一個機會去重新由低做起, 不是每個人都有機會重新開始, 難得我有take 2, 應該覺得高興哩!

不過, 請留意… 這個offer暫時只是個”有可能renew”的6個月contract, 都未知日後如何, 不過我記得姫絲汀分析時提過, 即使6個月就完蛋, 有什麼lose? 唔… 無錯! 損失的只不過是6個月的青春, 以及gallery的offer, 但至少工作性質會被其他art organization 認可, 相反如果我去做gallery, 一做做幾年, 之後或者都要繼續做gallery, 好難轉返去做events 及art education, 而且師姐話工作性質及環境都應該會適合我, 再加上有陰影啦~ 之前已經無左個好老細加好offer啦~ 所以今云就唔好諗咁多, 所以哩…死就死, 去就去!

星期三就開工, 五天工作返10放6, 不過有event/workshop就會weekend+overnight都唔定… 慘咯! 鰂魚涌太古坊… 隔離果棟工廠大廈! 祝我好運啦!

備註: 6個月後如果唔好彩的話, 我有可能又再要謀事, 所以朋友們, 請繼續為冰鮮留意有咩工適合我~ 仲有, 我有意繼續入adc proposal+想搵平日夜晚part time教書, 有好路數請與冰鮮聯絡!