噏噏濕濕了成個星期,幾乎要生菇了,終於今日見青天,馬上煥然一新,醒神!

天氣大好,心情大好,暖返,笑返,精靈返,宜行山!於是搭車上山,行路落中環!

每次見到人放狗出街,在草地上活力充沛地奔跑,再望下家中小貓成尊佛咁坐定定唔郁,我都想養隻狗狗陪我跑,奈何一想到狗會吠會周地去還會流口水...算啦,好明顯我其實不太愛狗(而且有少少驚狗),我還是希望將來能訓練一隻會出街會跑的貓貓好了!

或者,動物協會可考慮在公園外搞「租狗」生意,跟租單車差不多,橫豎要walk the dog,話唔定會有有心之士與狗狗walk完會想把牠們正式領養回家。